अहमदनगर : शाळेतून घराकडे रस्त्याने पायी जाणार्या महिलेच्या गळ्य़ातील दोन तोळे वजनाचे सोन्याचे मंगळसूत्र मोटारसायकलवरील अनोळखी दुचा...
अहमदनगर : शाळेतून घराकडे रस्त्याने पायी जाणार्या महिलेच्या गळ्य़ातील दोन तोळे वजनाचे सोन्याचे मंगळसूत्र मोटारसायकलवरील अनोळखी दुचाकीस्वाराने बळजबरीने हिसकावून घेतले. ही घटना नगर-मनमाड रोडवरील ऑक्झिलिअम शाळेजवळ गुरुवारी सकाळी दहा वाजता घडली. बारा तासांमध्ये आरोपी जेरबंद करण्यात स्थानिक गुन्हे शाखेला यश मिळाले आहे.
पोलीस कर्मचारी संजीव पाटोळे यांची पत्नी सुनीता पाटोळे या शाळेतून घराकडे निघाल्या होत्या. यावेळी लाल रंगाच्या नंबर नसलेल्या दुचाकीस्वाराने त्यांच्या गळ्य़ातील मंगळसूत्र हिसकावले. चोरलेले मंगळसूत्र दोन तोळ्य़ाचे आणि ४0 हजार रुपये किंमतीचे असल्याचे सुनीता पाटोळे यांनी तोफखाना पोलिस ठाण्यात दिलेल्या फिर्यादित म्हटले आहे. सोन्याचे मंगळसूत्र चोरीला गेल्यानंतर तोफखाना पोलीस ठाणे, स्थानिक गुन्हे शाखेच्या पोलिस पथकाने तपासाची चक्रे फिरविली. रेकॉर्डवरील आरोपींना ताब्यात घेवून चौकशी केली असता एकाने मंगळसूत्र चोरल्याची कबुली दिली. त्याच्याकडील आढळून आलेले चोरीचे मंगळसूत्र हे पाटोळे यांचेच असल्याचे स्पष्ट झाले. ते लगेच ताब्यात घेण्यात आले.
हनुमंत येलू शिंदे (रा. लेखानगर, पाईपलाईन रोड) असे आरोपीचे नाव आहे. त्याला तोफखाना पोलिसांच्या ताब्यात देण्यात आले आहे, असे गुन्हे शाखेचे पोलीस निरीक्षक शशिराज पाटोळे यांनी सांगितले. चोरी करण्याची पद्धती आणि साक्षीदार यावरून चोर कोण आहे, याचा तपास लागला असे पाटोळे यांनी सांगितले.
स्थानिक गुन्हे शाखेचे उपनिरीक्षक संजयकुमार सोनी, कर्मचारी योगेश गोसावी, शैलेश गोमसाळे, रोहित मिसाळ, प्रमोद जाधव, देवा काळे यांच्या पथकाने ही कारवाई केली.
